Gamer PC хэрхэн сонгох вэ
Тоглоомын гүйцэтгэлийг хамгийн их нь видео карт шийддэг. Тиймээс эхлээд дэлгэц, тоглох тоглоомоо тодорхойлоод, видео картаа сонгож, бусад эд ангийг түүнд тааруулна.
Хиймэл оюуны серверүүд санах ойн үйлдвэрлэлийг их хэмжээгээр эзэлж байгаа тул DDR5-ийн үнэ нэг жилийн дотор хэд дахин өсөв. 2026 оны 6-р сард 32 ГБ-ийн хамгийн хямд иж бүрдэл 375 ам.доллар болсон, өмнөх жил 100 доллар ч хүрэхгүй байсан (Tom's Hardware). Үнийг хэд хэдэн дэлгүүрээс харьцуулж асуугаарай.
1. Юун дээр, юу тоглох вэ
Дэлгэцийн нягтрал (1080p, 1440p, 4K) болон секундэд хэдэн кадр (FPS) хүсч байгаагаас хамаарч хэрэгтэй хүчин чадал өөр. Доорх хүснэгт нь эхлэх цэг:
| Зорилго | Видео карт | Процессор | Санах ой |
|---|---|---|---|
| Анхан шат 1080p, 60–100 FPS. CS2, Dota 2, Valorant, PUBG | 8 ГБ. Жишээ: RTX 5060, RX 9060 XT 8 ГБ | 6 цөм. Жишээ: Ryzen 5 7600, Core i5-14400F | 16 ГБ (2 × 8) |
| Дунд 1080p 144 Гц эсвэл 1440p 60 FPS | 12–16 ГБ. Жишээ: RTX 5060 Ti 16 ГБ, RTX 5070, RX 9060 XT 16 ГБ | 6–8 цөм. Жишээ: Ryzen 5 9600X, Ryzen 7 7700 | 32 ГБ (2 × 16) |
| Өндөр 1440p, 144 Гц ба түүнээс дээш | 16 ГБ. Жишээ: RTX 5070 Ti, RX 9070 XT | 8 цөм. Жишээ: Ryzen 7 9700X, Ryzen 7 9800X3D | 32 ГБ (2 × 16) |
| Дээд зэрэг 4K эсвэл 1440p 240 Гц | 16 ГБ ба түүнээс дээш. Жишээ: RTX 5080, RTX 5090 | Ryzen 7 9800X3D түвшний | 32–64 ГБ |
Загварын нэр нь жишээ. Шинэ загвар гарвал ижил ангиллынхыг сонгоно. Ангиллыг RaidGG, Corelab-ийн 2026 оны зөвлөмжид тулгуурлав.
2. Видео карт — хамгийн чухал
Тоглоомын компьютерт төсвийн хамгийн их хэсгийг видео картад зарцуулна. Сул видео карттай хүчтэй процессор тоглоомд бараг нэмэр болохгүй.
- Видео санах ой (VRAM). 1080p-д 8 ГБ хамгийн бага хэмжээ. 1440p, ray tracing-д 12–16 ГБ авбал дараагийн 3 жил хүрэлцэнэ.
- Тэжээл. Картын үйлдвэрлэгчийн зөвлөсөн тэжээлийн чадал (Recommended PSU), залгуурын төрлийг шалгана.
- Урт. Том картууд 30 см-ээс урт байдаг. Корпус дотор багтах эсэхийг хэмжээгээр нь тулгана.
3. Процессор
- Ихэнх тоглоомд 6 цөм хангалттай. Стрим хийх, видео засах бол 8 цөм.
- AMD-ийн X3D үсэгтэй процессорууд тоглоомд онцгой хурдан.
- Ирээдүйд процессороо солих бол шинэ платформ (AM5 гэх мэт) дээр авах нь ашигтай — эх хавтангаа солих шаардлагагүй.
4. Санах ой (RAM)
- Заавал 2 ширхэг. Хоёр ширхэг санах ой нэг том ширхэгээс хурдан ажилладаг (дэлгэрэнгүй).
- Зөвхөн тоглоом тоглох бол 16 ГБ одоо ч хүрэлцэнэ. 32 ГБ бол хамгийн зөв сонголт.
- Үнэ өндөр байгаа тул эхлээд 16 ГБ аваад, дараа нь өөр 2 ширхэг нэмэх боломжтой 4 слоттой эх хавтан сонгож болно.
5. Диск
Зөвхөн NVMe SSD. Хамгийн багадаа 1 ТБ — нэг том тоглоом 100 ГБ-аас их зай эзэлдэг болсон. Эргэдэг диск (HDD) зөвхөн кино, зураг хадгалахад.
6. Тэжээлийн блок
Хамгийн их хэмнэдэг, хамгийн их асуудал үүсгэдэг эд анги. Нэр хүндтэй брэнд, 80 PLUS Bronze ба түүнээс дээш зэрэглэлтэй, хэрэглээнээсээ 100–150 Вт илүү чадалтайг авна. Цахилгаан тасалдаж, хүчдэл хэлбэлздэг газарт энд хэмнэж болохгүй. Хэдэн Вт хэрэгтэйг тэжээлийн блокийн заавраас харна уу.
7. Корпус, хөргөлт
Урд талдаа тор бүхий, агаар сайн нэвтрүүлдэг корпус сонгоно. Шүүлтүүртэй бол тоос бага орно — Улаанбаатарын тоосонд энэ чухал. Хамгийн багадаа урд 2, ард 1 сэнс. Халалтын талаар энд.
8. Дэлгэц
- Видео картынхаа ангилалд тохирох нягтрал: анхан шат 1080p, дунд, өндөр 1440p.
- Хамгийн багадаа 144 Гц. 60 Гц дэлгэц дээр хүчтэй карт авах нь мөнгөө үрж байгаа хэрэг.
- Дэлгэцийн кабелийг видео картад залгана, эх хавтанд биш. Хамгийн түгээмэл алдаа.
Бэлэн авах уу, угсруулах уу
| Давуу тал | Анхаарах | |
|---|---|---|
| Эд ангиар угсруулах | Мөнгө бүр хэрэгтэй газраа очно. Дараа нь сайжруулахад хялбар. | Эд анги бүрийн баталгааг тусад нь асуух |
| Бэлэн компьютер | Нэг баталгаа, шууд ажиллана | Тэжээл, санах ойг ихэвчлэн хямдаар сольсон байдаг — жагсаалтыг нь шалга |
| Тоглоомын зөөврийн | Авч явж болно | Ижил үнэтэй ширээнийхээс сул, илүү халдаг, сайжруулах боломж бага |
Худалдаж авахдаа шалгах зүйлс
Эд ангийн жагсаалтыг бичгээр авах
Видео карт, процессор, санах ой, диск, тэжээлийн блок бүрийн бүтэн загварын нэр. «RTX видео карттай» гэхэд хангалтгүй.
Баталгаа, баримт
Баталгааны хугацаа хэд вэ, эвдэрвэл хаана засуулах вэ. Баримтаа хадгална.
Дэлгүүр дээр асааж шалгах
MyPC.mn програмыг USB-ээр аваачаад ажиллуулна, суулгалт шаардахгүй. Видео карт, санах ойн хэмжээ, слот, дискний эрүүл мэнд жагсаалтад бичсэнтэй таарч байгаа эсэхийг 1 минутад харуулна. «Тойм» хуудас үнэгүй, бүх дэлгэрэнгүйг 1 өдрийн лицензээр (3,000₮) харна.
Санах ойн хурд
BIOS-д XMP (Intel) эсвэл EXPO (AMD) асаалттай эсэхийг асуу. Асаагаагүй бол санах ой зарласан хурднаасаа удаан ажилладаг.
15 минут ачаалалтай тоглуулах
Тоглоом эсвэл тест ажиллуулж температурыг хар. Хэвийн хэмжээг видео карт, процессорын заавраас харна уу.
Хуучин бол илүү анхааралтай
Видео карт майнинг хийхэд ашиглагдаж байсан эсэхийг асуу. Дискний эрүүл мэндийг програмаар заавал шалга.
MyPC.mn-ийн үнэгүй програм компьютерын видео карт, процессор, санах ой, дискийг уншаад, зарласантай таарч байгаа эсэхийг харуулна. Юу ч өөрчлөхгүй. Татах хуудас
Түгээмэл асуултууд
NVIDIA эсвэл AMD?
Ижил үнээр AMD ихэвчлэн илүү видео санах ой, илүү FPS өгдөг. NVIDIA нь ray tracing, DLSS, стрим хийхэд давуу. Хоёулаа сайн — хүснэгтээс өөрийн ангиллынхыг сонгоод үнийг харьцуул.
16 ГБ санах ой хүрэлцэх үү?
Зөвхөн тоглоом тоглох бол тийм, хоёр ширхэг байх нөхцөлтэй. Тоглож байхдаа Discord, хөтөч, стрим зэрэг нээлттэй байлгадаг бол 32 ГБ.
Хуучин видео карт авах нь зөв үү?
Хямд байж болох ч баталгаагүй. Боломжтой бол ажиллаж байхыг нь өөрийн нүдээр харж, 15 минут ачаалалтай шалгаад, температур, дүрсний алдаа байхгүй бол ав.
Одоо байгаа компьютероо сайжруулж болох уу?
Ихэвчлэн видео карт, SSD, санах ойг сольж болно. Юуг солих нь хамгийн их үр дүнтэйг MyPC.mn програм харуулна. Тэжээлийн блок шинэ картыг даах эсэхийг заавал шалга.